تعبير من نسج الخيال ... ولكن احساس وآقعي

قامت احدى الاخوات الزميلات في احدى المنتديات بوضع مسابقه شعريه مضمونها انها وضعت صوره غايه في الجمال وكانت المسابقه ان أفضل من يستطيع تصوير المنظر بقصيده رائعه يكون الفائز

كنت احد المشاركين

وأحببت ان اضعها بين ايديكم

عسى ان تنال على حسن ذائقة الجميع


الصوره موجود

فيهاعلى جسر طيرين جنب بعض

الطيري الامامي

سميته (غندور)

والخلفي الحزين المسكين

سميته (صياح)







يالله صلوا على النبي

غندور :


ياصاحبي صياح وش فيك مقهور = يالله مشينا الوقت ياصاحبي راح
الليل قرب مابقا في السماء نور = ومن الصباح وماطر الغيم طياح





صياح :


الجو يجبرني ولو كنت ممطور = اشاهد اللي كان في الجو مياح
والله لو تدري بما بي ياغندور = ما لمت خفاق ن من الموجعه صاح





غندور:



وشلون ما آلومك ولك عدة شهور = في ذا الجسر ما غير مسراح مرواح
ياصاحبي اصحا ترى ما أنت معذور = خل الوهم منك ورح عشك أرتاح





صياح:



أنا أشهد أنك دايم الدوم مطيور = مربوش ما تصبر على طول سواح
ما لاف كبدك من حيا النار مسعور = ولا وطاك اللي وطى كبد صياح





غندور :



وأنا أشهد أنك دايم الدوم مغرور = ما كن به غيرك معه قلب نضاح
تبي الحقيقه .. في الحشاء خل مستور = وانا على شوفه شفوق ن وشباح





صياح:



ياسعد عين اللي على الشوف مقدور = ماهوب مثلي عامي ن وين ما راح
من يوم مات الخل ماني بمسرور = يقطعك ياجسر ن عليه الضنا طاح





غندور:



دامك عرفت ان الزمن دور ثم دور = عش دورك الباقي سعادات وأفراح
لا تنتظرها ما بقى دمع منثور = ما راح راح وما نفع صيح صياح




صياح:



ياصاحبي غندور خذ مني الشور = على سما معشوقتك فل الأجناح
أنا هنا ما دمت عايش ومعمور = أخفي دمع عين ن على الوجه فضاح





غندور:



أستاذنك ياصاحبي جاني شعور = أنك مع الايام في يوم ترتاح
مافيه جرح الا وله كم دكتور = خلني ألحق من على القلب مجتاح




صياح:



قد مت مبطي لو ماني بمقبور = وما ينفع الميت من الطب جراح
والله لو آعيش من عمري دهور = ما أنساه وآنا طاير الحب صياح